Minggu, 25 Mei 2008

Pituah (1)

Cando maelo abuak dalam tapuang
Abuak dapek, tapuang indak taserak...

Rabu, 21 Mei 2008

Ciloteh Kadai (1)


Paniang Palo Wak Dek E...

ALAH labiah satangah jam si Malin hilia-mudiak di muko Kadai Upiak Manieh. Tiok sabanta, dipiyuahnyo sunguik nan hanyo tumbuah di ujuang-ujung ateh bibia. Lah samak lo mato si Sutan mancaliaknyo.
Kopi satangah nan talatak di ateh meja, lah dingin pulo. Goreang pisang nan dikupie sangenek, lah diuruang langau. Lah paneh rasonyo tangan si Sutan mahalau. Samantaro si Upiak Manieh nan punyo kadai, lah sereang pulo caliaknyo ka si Malin. "Awas kalau ndak dibayianyo kopi jo goreang tu. Den siraman ka kapalonyo, beko," kecek si Upiak dalam hati.
"A tu nan bapikiaan, Malin? Barek bana nampaknyo," kato Sutan.
Bukannyo manjawek kecek si Sutan, Malin hanyo maadok an talapak tangan kanan ka arah si Sutan. Mungkin inyo manyuruah si Sutan untuak indak mangaduah dulu. Tapi, dek maliek gaya si Malin tu, tabik meha si Sutan. "Sombong ang lai Malin. Waden batanyo elok-elok. Kok indak namuah manjawek, jan takah tu lo lagu ang!"
"Saba Sutan. Indak elok parabo takah tu. Capek gaek beko. Awak mudo baru," jawek Malin, cameh sambia duduak baliak ka bangkunyo, sabalah si Sutan.
Diminumnyo kopi nan dingin tu sadaguak. Dikupienyo pisang goreang nan diuruang langau tadi sampai habih. Samantaro si Sutan, mauruik dado mancaliak parangai si Malin.
"Ho..aak! Baru kanyang paruik kito dek e," kato si Malin indak maraso basalah.
"Lah kanyang? Jadi ba a caritonyo, tadi tu?" sasak Sutan.
"Haah...Baiko mah Sutan. Kito tadi mamikiakan be be em nan katonyo ka naiak pulo di bulan muko. Samantaro, kito tak punyo gaji tatap. Sutan kan tau mah apo karajo kito."
"Tu, manga takah tu bana mamikiakannyo. Sadang pejabat awak se bantuak indak paduli, apo awak nan bansaiak ko lai bisa makan atau indak kalau be be em ko naiak."
"Itu lah. Kan lah samo-samo tau. Baru se isu be be em ko ka naiak, bareh, lado, minyak goreang, talua, lah dulu naiak. Bisuak ko buko sikolah anak naiak pulo."
"Ndak itu se doh. Bini mintak naiak pitih balanjo pulo beko. Paniang wak dek e..." kato si Sutan sambia mamiciak-miciak kaniang.
"Makonyo, kito tadi paniang pulo mamikiakannyo," tambah Malin sambia maatak an tangan ka ateh kapalonyo nan ditakua.
Hanyo basalang sapaminuman aia. Datang si Buyuang maoncong-oncong masuak kadai. Herannyo mancaliak Si Sutan nan mamiciak-miciak kaniang dan si Malin nan manakua an kapalo.
"Apo tuh? Barek bana nampaknyo, mah. Kopi ciek, Piak. Catat se dulu di bon utang ambo," kecek si Buyuang.
"Ba a ndak ka paniang. Be be em ka naiak pulo. Gulo se lah naiak lo patang," jawek si Upiak, masam. Tabayang dek inyo utang si Malin, si Sutan dan si Buyuang yang alah banyak.
"Ooo...mantun. Manga lo itu dibuek paniang," kecek si Buyuang, enteng.
Mandanga kecek si Buyuang, tadongak kapalo si Malin. Si Sutan pun baranti mamiciak kaniang. Dipandangnyo si Buyuang, bantuak indak picayo.
"Apo kecek ang? Lai bapikia sabalun mangecek tuh?" rarau si Sutan.
"Tu maleh kito duduak di kadai ko. Alun manga-manga, Sutan lah marabo. Danga lah dulu kecek kito," jawek si Buyuang, cameh.
"Jadi, apo mukasuik wa ang, mangecek takah tu?" tanyo si Malin.
"Yo lah. Ambo caritokan. Ambo baru baliak dari kantua lurah. Tadi malam, Pak Er Te manyuruah pai ka sinan hari kini. Katonyo ado P3K di kelurahan."
"Wayoik...Baru tu mah...Di rumah den ado pulo P3K," salo si Sutan.
Mandanga kecek si Sutan tu, tabik meha pulo si Buyuang. "Tu kan. Alun salasai den mangecek, lah bapotong pulo. Ka bataruih an atau indak?" ancam si Buyuang.
"Yo lah. Taruihan..." kato si Malin.
"P3K tu, Pertolongan Partamo Pado Kemiskinan. Indak Pertolongan Partamo Pado Kecelakaan doh..." jawek si Malin sambia tasanyun.
"Kato Pak Lurah, dek pemerintah ka manaiak an be be em, ado kompensasi nan diagiahkan ka masyarakaik miskin takah awak-awak ko. Namonyo BLT. Bantuan Langsuang Tunai. Katonyo ado pitih jo sembako."
Si Malin, si Sutan, jo Upiak Manih, mangguik-mangguik mandanga kecek si Buyuang. "Ba a cara maurusnyo tu Buyuang," kato si Upiak.
"Gampang se nyo. kalau lah punyo surek katerangan urang miskin, tingga mambaok itu se ka kalurahan. Kalau balun, urus surek tu dulu ka Er Te, Er We dan kalurahan."
"Ooo....bak mantun....!" jawek si Malin dan si Sutan, bairiangan.
"Lakehlah ka sinan. Habis tu, bayia utang kalian lai," kato si Upik sambia tasanyun manih. (*)
Pakanbaru, 21 Mai 2008

Sapo Manyapo


Bairiang balam jo barabah Tibo di parak anau Sairiang salam sarato sambah Kapado sanak di rantau

Talabiah pado cadiak pandai blogger, Uda Budi Putra, Si Cemek, Si Lelek, Sia se nan maraso...
Namonyo anak baru mantah, tolong agiah kito tunjuak jo aja...
Iko blog untuak manulihkan raso rindu ka kampuang halaman nan jauah di mato...
Rencananyo, beko ado pantun, pituah, ciloteh lapau, dendang, bakaba...

Ramo-ramo si Kumbang Jati Tabang ka arah bungo Matohari Kok ado kato nan salah tadi Usah dibaok sampai mati

Bari maaf jo ampun
ttd
Sutan Ho